សេចក្តីប្រកាសព័ត៌មាន

  • តុលា ១៤, ២០១៦

ស្ថាន​អគ្គ​កុង​ស៊ុល​​កម្ពុជា​​សម្រ​ប​សម្រួល​​ដោះ​លែង​​ពលរដ្ឋ​ខ្មែរ​​​​​១៣នាក់​​នៅ​​ម្តុំផ្សារ​​រ៉ុងក្លឿ​ ខេត្ត​សាកែវ​

ស្ថានអគ្គកុងស៊ុលកម្ពុជាប្រចាំខេត្តសាកែវ បានផ្តល់ព័ត៌មានថា នៅថ្ងៃទី២៧ ខែកញ្ញា ឆ្នាំ ២០១៦ នគរបាលអន្តោប្រវេសន៍ថៃ រួមនឹងអាជ្ញាធរពាក់ព័ន្ធមូលដ្ឋាន បានចុះត្រួតពិនិត្យអ្នកឆ្លងដែនចូលប្រទេសថៃនៅចំណុចបរិវេណបន្ទប់ជួល១០០ខ្នង ឃុំប៉ារ៉ៃ ស្រុកអារញ្ញប្រាថេត ខេត្តសាកែវ និងបានឃាត់ខ្លួនពលរដ្ឋកម្ពុជា ដែលឆ្លងដែនទៅស្នាក់នៅនិងធ្វើការខុសច្បាប់ ចំនួន១៣នាក់

ស្ថានអគ្គកុងស៊ុល បានទៅជួបពលរដ្ឋខ្មែរទាំង១៣នាក់ នៅប៉ុស្តិ៍នគរបាលអន្តោប្រវេសន៍ស្រុក អារញ្ញប្រាថេត និងទទួលបានព័ត៌មានថា ពលរដ្ឋខ្មែរទាំងនោះ (បុរស១០នាក់ និងនារី៣នាក់) មកពីខេត្ត កំពង់ចាម បាត់ដំបង និងបន្ទាយមានជ័យ បានឆ្លងដែនចូលទៅប្រទេសថៃ ដោយពុំមានឯកសារអ្វីទាំងអស់ ហើយស្នាក់នៅនិងប្រកបរបរដេរទ្រនាប់ជើង និងបោកអ៊ុតនៅក្បែរផ្សាររ៉ុងក្លឿ។

ស្ថានអគ្គកុងស៊ុលបានសម្របសម្រួលជាមួយអាជ្ញាធរថៃឲ្យដោះលែង និងបញ្ជូនពលរដ្ឋខ្មែរទាំង១៣នាក់ ត្រឡប់មកកម្ពុជាវិញ នៅព្រឹកថ្ងៃដដែល តាមច្រកទ្វារព្រំដែនអន្តរជាតិប៉ោយប៉ែត៕

      ថ្ងៃទី ០៤ ខែតុលា ឆ្នាំ២០១៦


សេចក្តីប្រកាសព័ត៌មាន

  • កញ្ញា ២៦, ២០១៦

ស្ថានអគ្គកុងស៊ុលកម្ពុជាប្រចាំខេត្តសាកែវជួយធ្វើមាតុភូមិនិវត្តន៍ដល់ពលរដ្ឋខ្មែរ៣៤នាក់

បន្ទាប់ពីមានការចុះផ្សាយព័ត៌មានក្នុងប្រព័ន្ធឃោសនា ស្តីពីករណីអាជ្ញាធរថៃឃាត់ខ្លួនពលករខ្មែរខុសច្បាប់ ៣៦នាក់ ដែលទៅធ្វើការបេះផ្លែឈើនៅខេត្តឈៀងម៉ៃ ស្ថានអគ្គកុងស៊ុលកម្ពុជាប្រចាំខេត្តសាកែវ បានទាក់ទងនិងសហការជាមួយអាជ្ញាធរពាក់ព័ន្ធ និងនគរបាលអន្តោប្រវេសន៍ថៃ ដើម្បីអន្តរាគមន៍ជួយពួកគាត់ត្រឡប់ទៅកម្ពុជាវិញ។

នៅថ្ងៃទី ២២ កញ្ញា ២០១៦ ស្ថានអគ្គកុងស៊ុល បានចុះទៅសួរសុខទុក្ខពលរដ្ឋខ្មែរទាំង ៣៤នាក់ (មនុស្សធំ ២៧នាក់ និងក្មេង៧នាក់) (ពុំមែន៣៦នាក់ទេ) នៅទីស្នាក់ការអន្តោប្រវេសន៍ខេត្តច័ន្ទបុរី។    ពួកគាត់បានឲ្យដឹងថា កាលពីថ្ងៃទី ២២ កក្កដា ២០១៦ ពួកគាត់បានចូលទៅប្រទេសថៃតាមច្រកព្រំដែនអន្តរជាតិដូង(បាត់ដំបង)-បានឡែម(ខេត្តច័ន្ទបុរី) ដោយប្រើប័ណ្ណចេញចូលប្រចាំថ្ងៃ។ នៅថ្ងៃដដែលមានមេខ្យល់ជនជាតិថៃ បញ្ចុះបញ្ចូលពួកគាត់ទៅធ្វើការងារបេះផ្លែមៀន និងផ្លែតាង៉ែន នៅខេត្តឈៀងម៉ៃ។  ពេលធ្វើការបាន១ខែកន្លះ ថៅកែពុំបើកប្រាក់ឈ្នួលឲ្យ ហើយបានដឹកពួកគាត់យកទៅទម្លាក់ចោលនៅកន្លែងស្ងាត់នៅក្នុងខេត្តឡាំភូន ភាគខាងជើងប្រទេសថៃ រួចគេចខ្លួនបាត់។ ដោយមានការជួយកអាសារពីអ្នកស្រុកថៃ នៅថ្ងៃទី ១០ កញ្ញា ២០១៦ ពួកគាត់បានធ្វើដំណើរមកដល់ផ្លូវជាតិ ប្រទះនឹងនគរបាលខេត្ត ហើយក៏នាំពួកគាត់មកឃុំឃាំងសាកសួរព័ត៌មាន និងបានបញ្ជូនមកអន្តោប្រវេសន៍ខេត្តច័ន្ទបុរី។ ដោយពលរដ្ឋទាំងនេះ ជាជនឆ្លងដែនខុសច្បាប់ នគរបាលថៃបានសំរេចបញ្ជូនពួកគាត់ត្រឡប់ទៅកម្ពុជាវិញ។

ស្ថានអគ្គកុងស៊ុល បានសហការជាមួយនគរបាលអន្តោប្រវេសន៍ខេត្តច័ន្ទបុរី ធ្វើមាតុភូមិនិវត្តន៍ពលរដ្ឋខែ្មរទាំង៣៤នាក់ ត្រឡប់មកកម្ពុជាវិញ តាមច្រកព្រំដែនអន្តរជាតិដូង-បានឡែម នៅថ្ងៃទី ២២ កញ្ញា ឆ្នាំ២០១៦។ ជាមួយគ្នានេះដែរ ស្ថានអគ្គកុងស៊ុល បានស្នើដល់សមត្ថកិច្ចពាក់ព័ន្ធថៃជួយរកមុខសញ្ញាជនជាតិថៃដែលជាមេខ្យល់ មកផ្តន្ទាទោសតាមច្បាប់។

ថ្ងៃទី ២៦ ខែកញ្ញា ឆ្នាំ២០១៦


សេចក្តីប្រកាសព័ត៌មាន

  • កញ្ញា ២, ២០១៦

កិច្ចអន្តរាគមន៍ជួយពលករខ្មែរ១៦នាក់ ដែលត្រូវបានឃាត់ខ្លួននៅខេត្តសាកែវ ប្រទេសថៃ

ឯកឧត្តមទេសរដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ បានណែនាំអោយស្ថានអគ្គកុងស៊ុលកម្ពុជាប្រចាំខេត្តសាកែវ ធ្វើអន្តរាគមន៍ដោះស្រាយជាបន្ទាន់ បន្ទាប់ពីបានទទួលដំណឹងថា មានពលករខ្មែរចំនួន១៦នាក់ ត្រូវបានឃាត់ខ្លួននៅខេត្តសាកែវ   ខណៈដែលពួកគេធ្វើដំណើរពីទីក្រុងបាងកកត្រឡប់មកកម្ពុជាវិញ ដោយពុំមានលិខិតឆ្លងដែនឬឯកសារធ្វើដំណើរ។

ស្ថានអគ្គកុងស៊ុល បានចុះជួបសួរសុខទុក្ខពលករខ្មែរទាំង១៦នាក់ (បុរស៧នាក់ – នារី៩នាក់) នៅអគ្គបញ្ជាការដ្ឋានកងទ័ពកម្លាំងបូព៌ាថៃ ស្រុកវឌ្ឍណាណាខន ខេត្តសាកែវ ហើយទទួលបានព័ត៌មានថា ពួកគេជាពលករស្របច្បាប់ ដែលបានធ្វើការនៅរោងចក្រកាត់ដេរ នៅទីក្រុងបាងកក។ ពលករទាំង១៦នាក់ បានសម្រេចចិត្តសុំឈប់ពីការងារ ប៉ុន្តែថៅកែពុំព្រមអោយឈប់ និងបានដកហូតលិខិតឆ្លងដែនរបស់ពួកគាត់ទុក។ ស្ថានអគ្គកុងស៊ុល បានសំរបសំរួលជាមួយអាជ្ញាធរថៃ ឲ្យមានការដោះលែងពលករខ្មែរ ហើយបានទាក់ទងជាមួយថៅកែថៃឲ្យប្រគល់លិខិតឆ្លងដែន ដល់ពលករខ្មែរទាំង១៦នាក់ នេះវិញ។

ក្រោយពេលទទួលបានលិខិតឆ្លងដែន ស្ថានអគ្គកុងស៊ុលបានរៀបចំជូនដំណើរពលករទាំង១៦នាក់នេះ ត្រឡប់មកកម្ពុជាវិញដោយសុវត្ថិភាព តាមច្រកព្រំដែនអន្តរជាតិប៉ោយប៉ែត នៅថ្ងៃទី២៨ ខែសីហា ឆ្នាំ២០១៦។

ពលករទាំង១៦នាក់ មានស្រុកកំណើតនៅខេត្តបន្ទាយមានជ័យ និងមានឈ្មោះដូចខាងក្រោម៖

១- យូ សារឿម   (ប្រុស)      អាយុ២៥ឆ្នាំ  នៅស្រុកមង្គលបុរី

២- យូ គឹមហួយ (ស្រី)        អាយុ២៧ឆ្នាំ  នៅស្រុកមង្គលបុរី

៣- យូ សេរី        (ប្រុស)      អាយុ២៥ឆ្នាំ  នៅស្រុកមង្គលបុរី

៤- យូ គឹមហ៊ុន   (ស្រី)        អាយុ២៥ឆ្នាំ  នៅស្រុកមង្គលបុរី

៥- ឡូយ ឡាត់    (ប្រុស)     អាយុ២២ឆ្នាំ  នៅស្រុកព្រះនេត្រព្រះ

៦- ឡូ ណាស៊ី      (ស្រី)       អាយុ៣៩ឆ្នាំ  នៅស្រុកព្រះនេត្រព្រះ

៧- រ៉ុមតេង          (ស្រី)         អាយុ១៩ឆ្នាំ នៅស្រុកព្រះនេត្រព្រះ

៨- តេ ស៊ុន          (ស្រី)         អាយុ២៣ឆ្នាំ នៅស្រុកព្រះនេត្រព្រះ

៩- តៃ ទី              (ស្រី)         អាយុ២០ឆ្នាំ  នៅស្រុកព្រះនេត្រព្រះ

១០- ឡុំ លឿ       (ប្រុស)      អាយុ២១ឆ្នាំ  នៅស្រុកព្រះនេត្រព្រះ

១១- ថា បារាំង    (ប្រុស)       អាយុ២១ឆ្នាំ  នៅស្រុកព្រះនេត្រព្រះ

១២- ថាន់ សុភណ្ឌ    (ប្រុស)    អាយុ២៨ឆ្នាំ  នៅស្រុកព្រះនេត្រព្រះ

១៣- សួន កាន          (ប្រុស)    អាយុ២៣ឆ្នាំ  នៅស្រុកព្រះនេត្រព្រះ

១៤- ញ៉ូវ គៀត          (ស្រី)       អាយុ២១ឆ្នាំ   នៅស្រុកព្រះនេត្រព្រះ

១៥- ស៊ុន ប៊ុនធៀវ     (ស្រី)       អាយុ២០ឆ្នាំ  នៅស្រុកព្រះនេត្រព្រះ

១៦- ខឿង សុឃឿម   (ស្រី)      អាយុ២០ឆ្នាំ  នៅស្រុកព្រះនេត្រព្រះ ៕

ថ្ងៃទី០២ ខែ កញ្ញា ឆ្នាំ ២០១៦


សេចក្តីប្រកាសព័ត៌មាន

  • មិថុនា ២៤, ២០១៦

ស្ថាន​អគ្គ​កុង​ស៊ុល​កម្ពុជា​ប្រចាំ​ខេត្ត​សាកែវ​ ប្រទេស​ថៃ ​អន្តរាគមន៍​ជួយ​ពល​ករ​ខ្មែរ​ ចំនួន​ ២២​នាក់ ​ឱ្យ​វិល​ត្រឡប់​មក​កម្ពុជា​វិញ​​

អាជ្ញាធរថៃខេត្តសាកែវ និងនគរបាលអន្តោប្រវេសន៍ខេត្ត  បានចុះត្រួតពិនិត្យ និងបោស សម្អាតពលករខុសច្បាប់ក្នុងសិប្បកម្មម្នាងសិលាចំនួន ៣ កន្លែង នៅឃុំសាលាលាំឌួន ទីរួមខេត្ត សាកែវ កាលពីថ្ងៃទី ២៣ ខែមិថុនា ឆ្នាំ ២០១៦ ហើយបានឃាត់ខ្លួនពលរដ្ឋខ្មែរចំនួន ២២នាក់ ដែលពុំមានលិខិតឆ្លងដែន ឬ Border Pass (១៦នាក់ជាពលករខុសច្បាប់ និងកុមារ៦នាក់ ជាកូនរបស់ពួកគេ)។ បន្ទាប់ពីបានទទួលព័ត៌មាននេះ ស្ថានអគ្គកុងស៊ុលកម្ពុជាប្រចាំខេត្តសាកែវ ប្រទេសថៃ  បានចុះទៅទីស្នាក់ការនគរបាលអន្តោប្រវេសន៍ ដើម្បីអន្តរាគមន៍ជួយពលករខ្មែរ ខុសច្បាប់ទាំងនោះ ឱ្យបានវិលត្រឡប់មកកម្ពុជាវិញ  ។

តាមការទាមទាររបស់ស្ថានអគ្គកុងស៊ុល និងការសំរបសំរួលរបស់អាជ្ញាធរថៃ ថៅកែថៃ បានយល់ព្រមផ្តល់ប្រាក់ឈ្នួលពលកម្មដែលពុំទាន់បើកជូនពលករទាំង១៦នាក់ និងបានសន្យាបន្ត ទទួលយកពលករទាំង១៦នាក់ខាងលើ ឱ្យចូលធ្វើការស្របច្បាប់ក្នុងសិប្បកម្មពេលវិលត្រឡប់ ពីធ្វើឯកសារឱ្យត្រឹមត្រូវនៅកម្ពុជា។ ទន្ទឹមនឹងនេះ ថៅកែបានយល់ព្រមចេញថ្លៃធ្វើឯកសារ ផ្សេងៗជាមុន ដោយបង់រំលស់ចំណាយទាំងនេះពីថ្លៃឈ្នួលពលកម្មរបស់ពលករ នាពេល ខាងមុខ។

ពលរដ្ឋខ្មែរទាំង ២២នាក់ នោះ បានមកដល់មាតុភូមិវិញហើយ កាលពីរសៀលថ្ងៃទី ២៣ ខែមិថុនា ឆ្នាំ ២០១៦ តាមច្រកអន្តរជាតិប៉ោយប៉ែត។

ថ្ងៃទី ២៤ ខែ មិថុនា ឆ្នាំ ២០១៦